Misuse of Facebook

MIZORAM POLICE PRESS RELEASE
Facebook hmanga inbum chungchang :
Tunlai hian sap hming inchhal a Facebook a mi bumching an awm a, a bikin Mizo hmeichhia bum theih awm deuh a an hriatte Facebook ah hmelhriat a siamin thilpek leh pawisate rawn thawn tur angin thiam takin an insawi a. Sap thlalak lem hmangin Facebook kaltlangten thianah an rawn siam a. An inkawm tlangnel hnuah, sap ram atangin gift/parcel rawn thawn anga insawiin an thil rawn thawn chu courier service emaw custom emaw a khul chhuah nan sum a tul thu an rawn sawi ta thin a ni. Hetiang a rawn titute hi mi bumhmang an ni a, mi pahnih pathum tangrual an ni tlangpui. Anmahni insawi rinawm nan, ‘Chumi khami chu lo bia la, a rawn hrilhfiah thei ang che,’ an ti a, anmahni zinga mi bawkin phone lo lain an lo chhang ta thin a ni. An bum turte mizia leh an chaklohna te zir hmasa phawt an ni bawk a, tam tak chuan an lo ring hman hie thin a ni. Mizo hmeichhia pali panga pawh bum tawhte zingah hian an awm a, thenkhat phei chuan Cheng Nuai 24 chuang hial an lo pe nghe nghe a ni. Hetianga inbumna lakah hian fimkhur a tul hie a, a bikin hmeichhia nu valai lam an target duh hie. Heng mite hi sap ram mi ni lovin India mi an nih ngei a rinawm. Chhuichhuah theih loh nan an phone no leh mail te an tidanglam thuai thin. Pawisa tamtak chan thlawnna mai a nih avangin pawisa thawn tura rawn ti chi reng reng chu pek loh phawt a him ber a ni. Hetiang laka fimkhur turin Facebook hmang tute Mizoram Police chuan a chah a ni.
 

Issued by The Police Public Relation Officer, Mizoram Police, Aizawl.

This website belongs to Police Department, Government of Mizoram, India. Hosted by DoICT, Template by ZENICS | Template by ICT