Online ILP Portal

Web links : https://ilp.mizoram.gov.in

Home Department leh ICT Department-te hmalaknain ILP Portal thar chu peihfel a ni ta a. Mizoram Home Minister, Pu Lalchamliana chuan Dt. 16.12.2019 khan Arya Mess, PHQ-ah mipui hman theih turin a hawng. He Web Portal (https://ilp.mizoram.gov.in) ah hian online-in ILP check leh endik(verify) theih a ni ang. Portal thar hmang chauh hian ILP – Temporary leh Regular-te pek chhuah tawh tur a ni ang. Portal thar peih fel a nih rual hian mipui leh NGO-te hman tur ILP Mizoram mobile app siam tel a ni a. Tin, Police duty-te hman tur ILP Enforcer mobile app siam a ni bawk. Heng apps te hi Google Play Store-ah download mai theihin a awm a, iOS version pawh siam fel ni tawhin AppStore ah dat vat tum a ni.

Portal tharah hian Sponsor-tute bio-data kimchang zawka pek a ngai tawh dawn a, tin sponsor-tu reng reng-in EPIC No. hmang chauhin hnam dang an sponsor thei tawh dawn a ni. Sponsor theih zat pawh system hian a ven tawh dawn avangin sponsor-tu ten kan mi chhawr(sponsor)-te ngaihvenzui leh an haw leh ngei em tih te thlenga ngaihven a tul tawh dawn a ni.

Mizoram chhunga hnamdang lo lut tur ILP ngai chi reng reng ten ILP an lak hnuah an haw leh dawnah Checkgate-ah in-report leh zel tur a ni dawn a, hei hi Mizoram an chhuahsan leh ngei tih chhinchhiahna kawngah a pawimawh dawn a ni. ILP pass holder dan lova Mizoram chhunga awm chhunzawm rengte chu an mahni mai bakah a sponsor-tute thlengin harsatna a siam chho thei tawh dawn a ni.

Tun hmain ILP lem hmangin hnam dang Mizoramah an lo lut thin nia hriat a ni a, hei hi sawrkar pawhin a ngaimawh hle a, kan portal thar hmang hian a check-na tur mobile app – ILP Mizoram siam a ni a, hei hi mipui ten hmang tangkai turin kan insawm a ni. ILP issue thar reng rengah chuan A4 Size (Detail) leh ID Card pek tel an ni tawh dawn a, heng pass issue ah te hian QR Code (Quick Response Code) dah tel a ni a, he QR Code hi ILP Mizoram app hmanga scan-in ILP lem leh tak chu a hriat theih dawn a, QR Code scan nan hian mobile apps dang hmang lo turin mipuite kan inhriattir a ni.

Portal tharah hian mipuite hmuh mai theih turin ILP – Temporary leh Regular issue zat dahchhuah a ni a, heng report mai bakah district ang zawnga issue zat enna te pawh mipuite hman tura pho chhuah a ni bawk. Portal thar hian hmasawnna hrang hrang a rawn ken tel rualin hmabak tih ngaite pawh a la awm a, heng ILP Online-a apply maina turte leh report kimchang zawk mipuite hnena pekte hi tuna hmalakna tur chhawpchhuah langsar deuhte an ni bawk.