No.F.14018/1/25-PR/05 Dated: Aizawl, the 10th September, 2025 : Tun hnaiah Mizoram chhungah ruihhlo veivak a pun nasat avang leh thalai zingah ruihhlo hman sual a hluar tak em avangin hemi beih letna atan hian Mizoram sawrkar chuan Police, Excise & Narcotics Department leh Central YMA nen tangkawpin thla 4 awh turin ruihhlo do beihpui, “Operation Against Trafficking and Use of Drugs and Narcotics” chu September 1, 2025 atang khan kalpui a ni. 

He ruihhlo dona beihpui thlak mekah hian Myanmar ramria inkalpawhna leh ramri dep khuate ngaih pawimawh hmasak a ni a. Heng ramri depa awm khaw 22 te pawh hi August thla khan tlawh chhuah vek niin khawtlang hruaitu – VC, YMA, VDP leh MHIP te nen hmalak dan turte tha takin ruahmanna siam a ni. 

A kaihhnawih Department leh pawl hrang hrangte ruahmanna leh thawhhona rah hmuh tur a awm tan a, Excise & Narcotics Department leh Central YMA tangkawpin khawlaia ruihhlo ngaite thenfai hna thawkin Police Department leh ramri chhehvela khawtlang tlawmngai pawl hrang hrang tanghovin ramriah nasa takin ruihhlo lut tur vengin an thawk bawk a, hemi avang hian beihpuithlak a nih hnu hian Mizoram pumah ruihhlo veivak a tlahniam nasa hlein hriat a ni. Ramri kana mihring leh lirthei veivak pawh a tlemin nasa takin ruihhlo lo lut a tlem phah a, Excise & Narcotics Department leh CID(Crime) hnuaia Special Narcotics PS ten tualchhunga ruihhlo an man (seized) zat a tlahniam a, ruihhlo man (cost) pawh a pun phah hle tih hriat a ni. Tin, Champhai District-ah pawh beihpuithlak a nih atangin District Police ten tum hnih bak ruihhlo an la man lova, ramriah mihring leh lirthei veivak a tlem avangin boruak pawh a muanawm hle a ni. 

Kan ram leh hnam venhimna tura sawrkar, VC, YMA leh NGO hrang hrang tangkawpin ruihhlo do beihpui a thlak mekah misual leh ruihhlo tawlh report kawngah te thahnemngai taka min thawhpui a, theihtawp min chhuahpui zel turin mipuite kan ngen tak meuh a ni.