Kumin (2025) chhung hian ILP checking vawi 48 (sawmli leh pariat) neih tawh niin, ILP nei lo leh hmang sual mi 281 lai man chhuah tawh an ni a. Hengte hi Court hmaah hruai tawh an ni. Police officer kalkhawmte chuan hmalak tawhnate tha thawkhat viauin lang mah se ṭan lak thar a ngai niin an hria a. Ngawrh zawka ILP checking neih rel niin, checking neih dan tur ruahmanna siam a ni. Aizawl khawpui chhunga veng hrang hrangte a veng bila a theih anga tuam turin ruahmanna siam a ni a. Hemi atan hian veng bil Local Council leh NGO hrang hrangte pawh phungbawm atan sawm ni se tia rel a ni.

Kal khawmte hian tunlai Aizawl District chhunga ILP neih ngai hnamdang mi lo luh dan thlirhona an nei nghal bawk a. August ni 20 atanga September ni 11 thleng awh tur, CAPF, SSF leh Assam Rifle Rifleman lakna kal mek, Combined Recruitment Rally avangin intlar tur candidate 7422 lai Aizawlah an fuankhawm mek a, hei hian ILP dilna a tih tam bakah khawlaiah hnamdang veivak a tihtam thu sawi lan a ni a, amaherawhchu heng mite hi sipai lak a zawh ruala mahni awmna lama haw leh tura ngaih an nih avangin ngaihthatlohna tur a awm lovah ngaih a ni. Chutihrualin recruitment rally lian a awm leh dawn a nih chuan candidate ten a tlachawpa ILP dil lovin, online-a dil theihna hrilhhriat kawngah hma lak ni se harsatna tam tak pumpelh theih a nih a rinawm thu pawh sawi lan a ni.

Tin ṭhenawm state-a ram dang mi hnawhchhuahna kal mekin Aizawl District leh Aizawl khawpui a nghawng em tih sawiho a ni a, inhnawhchhuahna hi Darrang, Dhubri, Goalpara, Golaghat, Hojai, Morigaon leh Nagaon District-te niin, Mizoram atanga hla tak vek an nih avangin, tun dinhmunah chuan min tihbuaina tur hriat a la nih loh bakah heng district atanga lo lut an awm hriat a la nih loh thu sawi lan a ni. Amaherawhchu, fimkhur thuah erawh ILP checking beihpui thlak laiin uluk lehzuala hmalak turin rel a ni.

Dan lova lo lutte laka inven hi kan zavaia mawhphurhna a ni a, hnam dang in luahtirtu, sponsor-tu, a chhawrtu leh mimal tinin dan kengkawhtute lo thawhpuia, theihtawpa kan ram a him zel theih nana hma min lakpui turin kan inngen a ni.