No.F.14018/1/25-PR/15  Dated the 19th December, 2025 :  Tun kuma DGsP-IGsP Conference chu Indian Institute of Management, Raipur, Chhattisgarh-ah November 28 – 30, 2025 khan neih a ni a. He Conference-ah hian State/UT hrang hranga DGP te leh CAPF/CPO hotu lute an tel kim vek a ni.

India Prime Minister zahawm tak Pu Narendra Modi duh danin “State Level Conference on Debriefing of DGsP-IGsP Conference – 2025” chu December ni 8 leh December ni 21, 2025 chhungin State/UT ten neih tura rel a ni a. Prime Minister duh dan angin a bawhzuina State Level Conference hi Chief Minister theuh te Chairman-na hnuaiah State chhung Police Officer lian hrang hrang te tel ngei tura rel a ni. State Level Conference ah hian National level DGsP-IGsP Conference in a lo rel tawh thutluknate inhrilhhriatna hun leh chak taka bawhzui tura infuihna hun atana ruahman a ni.

Vawiin Ni 19.12.2025 (Zirtawpni) hian India ram pum huap DGsP-IGsP Conference thurel bawhzuiin a vawikhatna atan State Level Conference on Debriefing of DGsP-IGsP Conference – 2025 chu DGP Conference Hall, Police Headquarters, Aizawlah neih a ni.

Pu Lalduhoma, Chief Minister, Mizoram, Pu K. Sapdanga, Home Minister, DGP Mizoram, CAPF/CPOs hotu hrang hrang Mizorama awm te leh Aizawl a Senior Police Officer te an tel a. Tin, Aizawl pawna Senior Police officer awm te’n Virtual Mode in he Conference hi an chhim ve bawk a ni.

He Conference-ah hian Pu Lalduhoma, Chief Minister chu Chairman a ni a, Pu Sharad Agarwal, DGP Mizoram chuan DGsP-IGsP Conference Recommendation chungchang presentation a nei a, National Security Scenario te, Geo-Political Challenges te, Bringing Back Indian Fugitives from abroad te, Women’s Safety te, Application of Artificial Intelligence in Policing te, Enhanced use of Forensics in Successful Investigation and Prosecution te, Police and Civil Defence Capacities in Disaster Management te, Countering Mass Education te, Vikshit Bharat : Vision 2047 chungchang te fiah leh ngaihnawm takin a sawi a. Tin, he hun hi remchangah hmangin kawng hrang hranga Mizoram Police-in mamawh a neih te leh Police tih phuisui lehzualna tura rawtna hrang hrangte Chief Minister leh Home Minister hriatah a sawi tel nghal bawk a ni. 

He Conference ah hian Home Minister chuan Police te hi dan kengkawhtu mai ni lovin, India Constitution vawnghimtu an nih thu a sawi a, Police te chu an thuneihnaah rinawm tak leh midangte hriatthiamna nei chunga thawk turin a beisei a, tunlai thiamna leh changkanna umpha tura intuaithar reng tur te leh mipui vantlang te nen tha taka thawk ho thiam turin a fuih a ni.

Chief Minister chuan DGsP/IGsP Conference-a Prime Minister hmalakna hi fakawm a tiin a ngaihhlut thu a sawi a. Prime Minister ho a thurel te hi a hlawhtlin theihna tura theihtawp a hma lak leh bawhzui nise a ti a, State dang te aia hnufum lova an ruala ke pen ve thei tura theihtawp chhuah  nise a ti bawk. Heng thurel tih hlawhtlin theihna tur atan a Mizoram Sorkar in tih theih a neihah chuan a tlanchhiat loh tur thu a sawi. Tin, dan lova ramri kaltlang a sumdawnna tihtawp kawnga Police te leh an thawhpui Department hrang hrang te thawh that thu sawiin, an thawh that avang hian ramri kaltlanga drugs lo lut leh a bikin dan lova kuhva rah a sumdawnna a tlakhniam thu a sawi a, Hachhek tlangdunga kuhva rah chingtute’n nasa takin an kuhva dan ang thlap in an hralh theih phah a ni. Kumin chhungin kuhva manah Cheng Vaibelchhe 5 chuang an tel thei a, an lawm zia entirnan ‘Kuhva Kut’ hial an buatsaih thu leh amah ngei pawhin a zuk tel pui thu a sawi bawk.

Tin, Chief Minister hian Section 20 of Bharatiya Nagarik Suraksha Sanhita, 2023 in a phut angin Mizoram Sorkar chuan Directorate of Prosecution dinna Notification chu 2nd December, 2025 khan chhuah a nih thu a sawi bawk a ni.